KHADIJA OMARY KOPA:- UHASAMA, ROHO MBAYA NA CHUKI NDIZO ZILIZOTUJAA WATU WA MUZIKI WA TAARAB!.

Na pambe za taarab.

           Malkia wa Taarab nchini Tanzania ni muimbaji mwenye mafanikio na asie na majivuno wala majisifu hata pindi unapokutana nae "live" usisite kumsalimu nae atakuitikia salamu yako, muimbaji huyu amepitia vikundi vingi vya Taarab tokea akiwa visiwani Zanzibar mpaka alipokuja huku Bara na kujiunga na bendi ya TOT na baadae Muungano kabla ya kurudi tena katika bendi ya TOT.

     Kwa sasa Malkia huyu anamiliki bendi yake mwenyewe iitwayo Ogopa Kopa Classic Bendi ingawa bado ni muajiliwa wa bendi ya TOT, zinapojitokeza shughuli za kichama na serikali basi Kopa hujumuika na wasanii wenzie katika kuitumikia bendi ya TOT kama ilivyo ada!.

MALKIA KHADIJA KOPA AKIFANYA YAKE.

   Nilipata wasaa wa kuzungumza na Malkia huyu ana kwa ana nikitaka kujua tasmini yake katika muziki huu wa Taarab tokea ameianzisha Ogopa Kopa na ni changamoto zipi ambazo huwa anakutana nazo katika suala zima la kuiendesha bendi yake?.

KHADIJA KOPA:- Nikianza na tasmini yangu kuhusu muziki huu ni kwamba muziki umekuwa ukikua kila kukicha na kutengeneza ajira kwa vijana wetu wengi ambao kwa sasa wameamua kufanya muziki kama maisha yao ya kila siku, nikija kwenye changamoto kwakweli ni nyingi mno mpaka wakati mwingine kama una roho nyepesi unaweza kusema mimi muziki basi!.

PAMBE ZA TAARAB!:- Basi kivipi Malkia hebu tufafanulie na wasomaji wangu wapate kujua ni nini haswa kipo ndani yake?.

KHADIJA KOPA:- Kumekuwa na kasumba mbaya kwa wamiliki wa vikundi vya Taarab ambavyo vimetangulia na wenyewe wanajiita wapo juu! " kwanza alie juu ni mungu pekee" wasijitie Matarahambe, bendi ikianzishwa na ikaonyesha muelekeo wa kusimama vizuri basi wataanza kuiandama kwa kila njia mpaka wahakikishe inapotea katika ulimwengu huu wa Taarab, hiki si kitu kizuri!.

KHADIJA KOPA AKIIMBA STEJINI.

PAMBE ZA TAARAB!:- Je unaweza kutupatia mfano wa kile ambacho bendi yako ya Ogopa Kopa imefanyiwa tokea ulipoianzisha Malkia?.

KHADIJA KOPA:- Si vyema kuwataja kwa majina sababu sheria hairuhusu na hasama na mtu sitaki, ninachowashauri waache kutufuatilia sisi kama Ogopa Kopa na wafanye mambo yanayowahusu, watambue wazi ridhiki mtoaji mungu, Kopa kama ni hai basi naamini ridhiki yangu ipo tu kwani imeandikwa katika vitabu kwamba kiumbe chochote kilicho juu ya uso wa dunia na bado kinapumua basi kitaendelea kupata ridhiki!, wanachofanya wao ni kuichelewesha tu isinifikie mapema.

PAMBE ZA TAARAB!:- Okey! tukirudi kuizungumzia Ziara yako ya mikoa ya kusini Lindi na Mtwara tasmini ya yale mapokeo kwa mashabiki wako unaionaje?.

KHADIJA OMARY KOPA AKIWA NA YOUNG HASSAN ALLY.

KHADIJA KOPA:- Kwakweli kwanza nimefurahishwa sana na watu wa mikoa ya Lindi na Mtwara kwani mapokezi waliyonipokea ni zaidi ya Malkia, wamejitokeza kwa wingi sana katika show zangu zote jambo linalonipa hamasa.

PAMBE ZA TAARAB!:- Mwisho una lolote la kuwaambia wapenzi wa Taarab hususani wapenzi wa bendi yako ya Ogopa Kopa Classic Bendi?.

KHADIJA KOPA:- Kubwa nawaambia wapenzi na mashabiki wangu wajiandae kutazama video zetu mpya kabisa.