KAPTEN TEMBA:- FUNGAKAZI MODERN TAARAB TUPO NA TUTAENDELEA KUWEPO DAIMA!.

NA KAIS MUSSA KAIS.

         Asalaam aleykum ndugu wapenzi na wasomaji wa blog hii bora kwa sasa nchini tanzania, blog pekee inayo zungumzia muziki wetu wa taarab kwa upana mkubwa pasipo kubagua bendi yoyote ile. 

   Leo siku ya jumamosi tunaianza ile segment yetu ya "Mjue msanii wako" ambayo itakuwa ikikujia siku na wakati kama wa leo, hapa utapata kuwajua wasanii mbalimbali ambao hapo kabla ulikuwa ukiwasikia kijuu juu kupitia vyombo mbalimbali vya habari hapa nchini. Tunzania.

    Aliepata bahati ya kutufungulia segment yetu hii ni Mkurugenzi wa Fungakazi modern taarab ambae anatambulika kama kapten Temba "mwanaharakati asieshindwa kirahisi", kwanza nilitaka kujua kimya chake cha muda mrefu kinaashilia nini? maana wadau wamekuwa wakimuulizia sana!.

KAPTEN TEMBA.

   KAPTEN TEMBA:- Mimi nipo, na bendi yangu ya fungakazi modern taarab ipo, isipokuwa tulikuwa kimya kidogo ili kupanga mikakati ni jinsi gani tunakuja tena kwa ujio ulio bora zaidi ukizingatia tulikuwa kimya kidogo, kuna nyimbo mpya tumeziandaa na baadhi tayari tumeshazifanyia mazoezi bado kuzirekodi tu.

  UBUYU WA TAARAB:- Wadau wangependa kujua elimu yako haswa ni ya kiwango gani na je uliwahi kupitia madrasa, maana rafudhi yako inaonekana kama nawe uliwahi kuimba kaswida kaka!.

   KAPTEN TEMBA:- Nina elimu ya kawaida tu ya kidato cha nne ambayo niliipata katika sekondari ya kigamboni, vile vile madrasa nimesoma sana, ingawa mimi ni mtoto ambae wazazi wangu wana dini tofauti, mama yangu ni muislam na baba yangu ni mkristo, ila kwa sasa mimi nimeamua kuwa katika dini ya uislam moja kwa moja na hata ndoa yangu na Zainab Machupa imefungwa kiislam.

 UBUYU WA TAARAB:-  Nilimuuliza katika muziki wa taarab ni nani haswa ambae unaweza kusema kwa namna moja ama ingine alichangia sana kukuvuta wewe kuingia katika utunzi mpaka uimbaji, maana kwa muda mchache sana umekuwa ukitajwa sana midomoni mwa wadau juu ya tungo zako na uimbaji wako mzuri?.

KAPTEN TEMBA NA SENIOR BACHELLAH!.

  KAPTEN TEMBA:- Naweza kusema kwamba Omari kopa marehemu na mzee yusuph ni watu walionivutia sana mimi na kujikuta nikitamani kuimba pia nikija upande wa watunzi nilikuwa navutiwa sana na mzee "Haji Machano" wa kule visiwani unguja kwani enzi zake alikuwa hana mpinzani kwa kutunga mashairi bora kabisa na yenye maudhui bora mbele ya jamii.

 UBUYU WA TAARAB:-  Tuzungumzie mahusiano yako na mkeo Zainab machupa yalianza vipi, maana kwa kumbukumbu yangu hapo kabla alikuwa ni msanii wako wakawaida kama walivyo wasanii wengine wa bendi yako ya Fungakazi modern taarab.

  KAPTEN TEMBA:-  Zainab machupa ambae kwa sasa ni mke wangu, nilianza kumuona hata kabla hajajiunga na mimi, kipindi kile nakwenda kwa Thabit Abdul kutengeneza nyimbo zangu nikiwa sollo artist, yeye alikuwa ni miongoni mwa wasanii ambao walikuwa wakinipa sapoti ya kuitikia chorus nyimbo zangu, pale ndipo nilipoanza kumpenda mpaka ilipofikia mimi kuanzisha bendi nikamshauri ujiunge nami kwenye Fungakazi akiwa na Dada zake,  ndipo mapenzi yetu yalipozaliwa mpaka kufikia ndoa na sasa nimezaa nae mtoto mmoja.

   UBUYU WA TAARAB:- Nimepata habari mmeimba wimbo mmoja wa kushirikiana wewe na mkeo wenye mahadhi ya mduara, je ni kweli? na kama kweli huo wimbo unaitwa jina gani?.

KAPTEN TEMBA:- Hizo habari ni kweli na wimbo unaitwa "Ndo tushapendana" nadhani hivi karibuni tutauachia hewani ili wadau na wapenzi wetu wapate kuusikia na kuelewa nini tulichokuwa tumekilenga humo.

  UBUYU WA TAARAB:-  Mwisho unaushauri gani kwa wasanii wenzio wa taarab, wadau na mashabiki wa Fungakazi modern taarab kwa ujumla?.

  KAPTEN TEMBA:- Ushauri wangu kwa wasanii wenzangu ni kwamba tuwe na upendo na tuache kuropoka ovyo mambo yasiyo tuhusu, hii inafanya chuki kuendelea miongoni mwetu kwani hakuna anaependa kuona akisemwa au kuzungumzwa kwa mabaya wakati hakuna ukweli wowote, kuhusu wadau na wapenzi wa Fungakazi modern taarab nawaambia wasisikilize maneno yoyote yanayosemwa na hao wasio jitambua!, Fungakazi tupo na tutaendelea kuwepo, wao wenye bendi za sikukuu ndio wanahangaika!. Ipo siku muhogo wataita muhohoo!!, sina la zaidi.